Penginjau PTPTN patut mayar pulai baru pinjau sida, ku Johari .

                          Penginjau PTPTN patut mayar pulai baru pinjau sida, ku Johari

KUCHING: Penginjau wang turu pelajar di nengeri tu patut ngembuan tanggungpengawa mayar pulai baru (wang turu) ngagai ijinsi ke bekaul ngambika bisi dikena nulung rebak baru enggau ke dudi.

Menteri Pengawa Berumah ti mega Menteri Dagang Temuai, Datuk Amar Abang Johari Tun Openg madahka, penemu sekeda orang ti madahka wang turu ambika bandingka PTPTN nya enda ibuh dibayar pulai baru nya pekara ti enda betul.

Iya madahka, orang ti enda bejalaika tanggungpengawa mayar pulai baru nya disema ke rangka laban ti semina ngira diri aja.

“Bisi sekeda orang madahka bulih pinjau ari PTPTN udah nya enda ibuh dibayar baru, nya salah, nuan udah teulihka wang turu udah nya enda dibayar reti iya nuan rangka laban semina ngira diri aja sereta enda ibuhka orang bukai.

“Penginjau ke teulihka penyulut baka 1st class maya ba universiti pinjau nya ditukar ngagai biasiswa, tang enti enda teulihka penyulut ke udah ditetap, duit ke diinjau nya patut dibayar ngambika bisi dikena mantu anak tauka nembiak rebak baru. Tu mega endang udah tanggungpengawa kitai ke nginjau.

“Nya alai bala nembiak mesti ingat anang deka ngena utai ke nadai dibayar, laban kitai ke nginjau duit nya dikena nampung pelajar, udah nya kitai mesti mayar pulai baru,” ku iya.

Abang Johari mansutka pekara nya lebuh bejadika pengawa nyuaka perais ngagai nembiak ke nyulut ba peresa perintah Yayasan Sarawak 2013, ungkup nembiak sitak Satok enggau Petra Jaya, ti diatur Yayasan Sarawak ba Sekolah Menengah Sains Kuching Utara ditu, kemari.

Ngenang penumbuh Yayasan Sarawak ku iya, Yayasan Sarawak ditumbuhka dikena mantu rayat ti amat begunaka duit dikena nampung pelajar ngagai renggat tinggi.

Nengah program Yayasan Sarawak ku iya, nengeri tu mayuh udah mantu nempa nembiak Bumiputera teulihka pelajar tinggi sereta meri penguntung ngagai menua enggau nengeri.

“Nya alai enti udah bulih wang turu tu kitai nembiak patut mayar pulai baru duit ke diinjau nya ngagai Yayasan Sarawak ngambika bisi dikena mantu rebak dudi, tu tanggungpengawa kitai,” ku iya seraya madahka diri mega mayar baru duit ke dikena nampung pelajar ba renggat tinggi ngagai Yayasan Sarawak.

Kelimpah ari nya dalam jaku pengelalu Direktor Yayasan Sarawak Mohamad Abu Bakar Marzuki madahka, tiap taun Yayasan Sarawak ngungkupka RM1.5 juta ngagai RM2 juta dikena mantu nembiak ke nyulut dalam perisa perintah.

Iya madahka ungkup belanja dikena nentuka nadai seiku nembiak ke patut dibantu tinggal ari nampung pelajar berengkah ari sekondari ngagai renggat universiti.

“Taun tu bisi 789 iku nembiak ke pemadu nyulut ti mungkur 53 buah sekula di sitak Satok enggau Petra Jaya nerima perais ari Yayasan Sarawak,” ku Abu Bakar.

Taun tu serata menua tu bisi 6,171 iku nembiak ke nyulut sereta patut nerima perais ti nyengkaum 2,076 iku nembiak renggat UPSR; 2,696 iku (PMR); 1,250 iku (SPM) enggau 149 iku nembiak ke pemadu nyulut ba peresa STPM. Penyampau nya bisi nambah 12 iku enti dibandingka taun nyin kemari bisi 6,159 iku penerima aja.

Nembiak ke nyulut diberi Sijil Penghargaan enggau Saguhati ke diberi Sijil Simpanan Premium Bank Simpanan Nasional ke sepenyampau RM100 ungkup nembiak UPSR; RM200 (PMR); RM500 (SPM) enggau RM700 ke nembiak STPM.

~DS~